Kif Nista’ Nirċievi l-Maħfra mingħand Alla?
L-indiema ġġib il-maħfra u l-fejqan permezz tal-qawwa ta’ Ġesù Kristu.
X’inhi l-indiema?
L-indiema hi ferm aktar minn li nagħrfu li għamilna xi ħaġa ħażina jew li ngħidu li jiddispjaċina. Hi bidla fil-moħħ u fil-qalb li tinkludi li niċħdu d-dnub u nduru lejn Alla għall-għajnuna u l-maħfra. Meta nindmu aħna nesperjenzaw ferħ dejjiem.
L-indiema hija ċ-ċans li nkunu aħjar. Alla jkun paċenzjuż miegħek hekk kif inti taħdem biex tegħleb ċerti drawwiet u vizzji ħżiena, u tagħmel ċertu tibdil veru f’ħajtek. Din il-bidla hi possibbli permezz ta’ Ġesù Kristu u s-sagrifiċċju tiegħu. Irrispettivament kemm tieħu żmien, żgur li vallapena.
Għalfejn għandi bżonn nindem?
Ħafna jemmnu li ma jeżisti l-ebda tajjeb jew ħażin per se. Madankollu, Alla jistenna ċerti affarijiet minna u Hu tana ċerti kmandamenti. Aħna lkoll imperfetti u lkoll neħtieġu li nindmu. “Il-bnedmin kollha dinbu u ċċaħħdu mill-glorja ta’ Alla” (Rumani 3:23). Dnubietna jżommuna milli nkunu nistgħu nerġgħu lura d-dar biex ngħixu ma’ Alla.
Ġesù Kristu pprovdielna mod kif niksbu l-maħfra. Huwa bata għal dnubietna ħalli jekk nindmu, aħna nkunu nistgħu nerġgħu nindafu u nkunu ħielsa mid-dispjaċir.
“Imqar jekk dnubietkom ikunu ħomor bħall-iskarlatt, isiru bojod bħas-silġ; mqar jekk ikunu ħomor bħall-kremżi, isiru bojod bħas-suf.” —Isaija 1:18
Barkiet tal-Indiema
Id-dnub huwa toqol kbir li jimliena b’dispjaċir u niket. L-indiema tneħħi dawk is-sentimenti minn ġo fina u tibdilhom f’kuntentizza. Alma, profeta fil-Ktieb ta’ Mormon, iddeskriva l-ferħ tiegħu wara li nidem: “Xejn ma jista’ jkun daqstant skwiżit u ħelu daqs kemm kien il-ferħ tiegħi” (Alma 36:21). Meta nindmu għal kollox, aħna niksbu l-maħfra u l-fejqan. Aħna nħossu fina l-paċi, il-ferħ, il-ħelsien, u l-kunfidenza.
Kif nista’ nindem?
Ġesù Kristu għandu l-qawwa li jaħfirlek dnubietek. Il-proċess tal-indiema mhux wieħed ikkumplikat, iżda xi kultant jaf ikun wieħed diffiċli. Il-Mulej wiegħed, “Dak li nidem minn dnubietu, hu maħfur, u jien, il-Mulej, ma niftakarhomx aktar” (D&C 58:42).
L-indiema hija esperjenza personali ma’ Ġesù. L-indiema għal ċerti dnubiet taf tieħu aktar żmien minn dnubiet oħra. Filwaqt li l-proċess tal-indiema m’għandniex inħarsu lejh bħala xi lista ta’ kontroll, dawn il-prinċipji jistgħu jgħinuk jekk m’intix ċert minn fejn se tibda jew jekk qed issibha diffiċli tara l-progress tiegħek.
Tgħallem il-Prinċipji tal-Indiema
Il-fidi f’Ġesù Kristu hi essenzjali fl-indiema. Ara li jkollok il-fidi li Ġesù Kristu jista’ jeħilsek mit-toqol tad-dnub u li inti tista’ terġa tindaf.
Agħraf li inti dnibt—li b’xi mod tbiegħedt minn Alla. Il-bidla ma tistax isseħħ jekk inti tirrifjuta li tammetti li għamilt xi ħaġa ħażina.
Għandek tħoss rimors veru għall-affarijiet f’ħajtek li huma f’kunflitt mar-rieda ta’ Alla. Ara li jkollok xewqa sinċiera li twettaq it-tibdil. Ladarba dnubietek ikunu maħfura, il-ferħ jieħu post in-niket tiegħek.
In-niket sinċier għandu jwasslek biex tieqaf tagħmel dak li hu ħażin. Ġesù qal lill-mara li nqabdet f’adulterju “Mur, u mil-lum ’il quddiem tidnibx iżjed” (Ġwanni 8:11).
Kun sinċier u onest ma’ Alla permezz tat-talb u ammetti li żbaljajt. Ladarba int tkun stqarrejt dnubietek, itlob għall-għajnuna. “B’hekk tkunu tafu jekk bniedem nidimx minn dnubietu—araw, huwa jistqarrhom u jiċħadhom” (D&C 58:43).
Jekk ikun possibbli, inti għandek issewwi l-ħsara kawża tal-għemejjel tiegħek. Jekk inti weġġajt lil ħadd ieħor, itlob lil dik il-persuna biex taħfirlek u agħmel li tista’ biex tirranġa s-sitwazzjoni.
Imla ħajtek b’attivitajiet edifikanti u li jqawwuk. Dawn jinkludu li tgħaddi ħin ma’ ħbieb tajbin, titlob, taqra l-iskrittura, u tmur il-knisja. Dawn l-attivitajiet iwasslulek il-qawwa spiritwali u qawwa akbar li tegħleb id-dgħjufijiet tiegħek.
Il-President Dallin H. Oaks tal-Ewwel Presidenza indirizza kull wieħed mill-prinċipji tal-indiema u qal, “Dan kollu huwa parti mill-istedina li nsibu ta’ spiss fl-iskrittura biex nersqu lejn Kristu.” (“Imnaddfin permezz tal-Indiema,” Ensign jew Liahona, Mejju 2019, 92). L-istedina kollha mħabba tas-Salvatur biex nindmu hija ħaġa mill-aktar importanti u li teħlisna fi żmienna bħalma kienet minn dejjem.
Tgħid jiena dnibt wisq biex nindem?
Ġesù Kristu ħallas il-prezz għal kull dnub. Jista’ jkun li inti ħassejt li dnubietek huma serji wisq jew li l-istess żball wettaqtu wisq drabi. Iżda irrispettivament minn kemm-il darba dnibna, aħna dejjem nistgħu nindmu u niġu maħfura. Ċerti dnubiet jaf ikun aktar faċli li nikkoreġuhom minn oħrajn, iżda Ġesù Kristu pprovda mod kif nistgħu niksbu maħfra totali minn kull dnub. Huwa jinsab ħerqan biex jaħfer.
