L-istedina li nimxu wara Ġesù hi stedina li nimxu wara l-eżempju tiegħu u nsiru bħalu. Tgħallem dwaru u fittex li tinkorpora l-kwalitajiet tiegħu f’ħajtek. Permezz tal-qawwa tal-grazzja tiegħu, inti tista’ ssir persuna aħjar li tixbah aktar lil Kristu.

Meta jkollok il-fidi fi Kristu, inti temmen fih bħala l-Iben ta’ Alla, l-Iben il-Waħdieni tal-Missier fil-ġisem. Inti taċċettah bħala s-Salvatur u l-Feddej tiegħek u timxi wara t-tagħlim tiegħu. Inti temmen li dnubietek jistgħu jinħafru permezz tal-Espjazzjoni tiegħu. Il-fidi fih tfisser li inti tafda fih u tinsab ċert li Huwa jħobbok.

Il-fidi hija prinċipju ta’ qawwa. Alla jaħdem permezz ta’ qawwa, iżda l-qawwa tiegħu normalment tiġi eżerċitata bi tweġiba għall-fidi tagħna. Hu jaħdem skont il-fidi ta’ wliedu. Id-dubju u l-biża’ huma l-oppost tal-fidi. Il-fidi tiegħek f’Ġesù Kristu tikber hekk kif inti ssir aktar midħla tiegħu u tat-tagħlim tiegħu. Hekk kif tesplora l-iskrittura u tiskopri x’hemm fiha, inti titgħallem dwar il-modi tiegħu, dwar l-imħabba tiegħu lejn kulħadd, u dwar il-kmandamenti tiegħu.

It-tama hi l-fiduċja dejjiema li l-Mulej se jġib fis-seħħ il-wegħdiet li għamel miegħek. Tidher fil-fiduċja, fl-ottimiżmu, fl-entużjażmu, u fil-perseveranza kollha sabar tiegħek. Hi li temmen u tistenna li se sseħħ xi ħaġa. Meta jkollok it-tama, inti tibqa’ għaddej qalb l-isfidi u d-diffikultajiet b’kunfidenza u b’ċertezza li kollox se jseħħ għall-ġid tiegħek. It-tama tgħinek tegħleb l-iskoraġġiment. L-iskrittura ħafna drabi tiddeskrivi t-tama f’Ġesù Kristu bħala l-assigurazzjoni li inti se tiret il-ħajja eterna.

Il-karità hi l-imħabba pura ta’ Kristu. Tinkludi l-imħabba bla limitu ta’ Alla lejn uliedu kollha. Aħna għandna nfittxu li niżviluppaw dik it-tip ta’ mħabba. Hekk kif inti titlob b’sinċerità għad-don tal-karità, tagħmel li tista’ biex tgħix tajjeb, u taqdi lil ħaddieħor, inti tibda tħoss fik preokkupazzjoni sinċiera għall-ġid u l-kuntentizza ta’ ħaddieħor. Inti tevita ċerti sentimenti negattivi bħar-rabja, l-għira, il-ġibdiet ħżiena, jew li tgħid ħwejjeġ negattivi dwar ħaddieħor. Inti tipprova tifhem kemm lilhom kif ukoll il-mod kif jaħsbuha. Inti turihom is-sabar u tipprova tgħinhom meta jkunu qed isibuha diffiċli jew jaqtgħu qalbhom. Il-karità, bħall-fidi, twasslek biex tagħmel xi ħaġa. Inti tiżviluppa l-karità hekk kif tfittex ċerti opportunitajiet biex taqdi lil ħaddieħor u toffri lilek innifsek.

Il-virtù toriġina fil-ħsibijiet u x-xewqat ta’ ġo fik. Hija sensiela ta’ ħsibijiet u mġieba bbażati fuq standards morali għoljin. Dak li inti tagħżel li taħseb u tagħmel meta tkun waħdek u temmen li ħadd mhu jarak huwa kejl tajjeb tal-virtù tiegħek.

Nies virtużi huma ndaf u spiritwalment safja. Huma jiffokaw fuq ħsibijiet ġusti u edifikanti u jwarrbu minn moħħhom ħsibijiet indenji li jwasslu għal għemejjel mhux xierqa. Huma jobdu l-kmandamenti ta’ Alla. Huma jitolbu li jkollhom il-qawwa li jirreżistu t-tentazzjoni u jagħmlu dak li hu xieraq. Huma ma jdumux ma jindmu minn xi dnubiet jew għemejjel ħżiena.

Is-sabar hu l-kapaċità li tibqa’ tissaporti d-dewmien, l-inkwiet, l-oppożizzjoni, jew it-tbatija mingħajr ma tinkorla, tiffrustra ruħek, jew toqgħod tinkwieta. Hi l-abbiltà li tagħmel ir-rieda ta’ Alla u taċċetta l-orarju tiegħu. Meta tkun mimli sabar, inti tibqa’ kalm waqt li tkun taħt pressjoni u tkun kapaċi tiffaċċja l-avversità bil-kalma u t-tama. Is-sabar hu relatat mat-tama u l-fidi—jeħtieġ li tibqa’ tistenna sakemm jiġu fis-seħħ il-barkiet imwiegħda tal-Mulej. Jeħtieġ li turi s-sabar ma’ kulħadd, inkluż miegħek innifsek, hekk kif taħdem biex tegħleb id-difetti u d-dgħjufija tiegħek.

L-umiltà hija r-rieda li tissottometti ruħek għar-rieda tal-Mulej u tonora lill-Mulej għal dak li Huwa wettaq. Tinkludi l-gratitudni għall-barkiet tiegħu u li tagħraf il-bżonn kostanti tiegħek għall-għajnuna divina tiegħu. L-umiltà mhijiex sinjal ta’ dgħjufija; hi sinjal ta’ qawwa spiritwali.

L-oppost tal-umiltà hija s-suppervja, li l-iskrittura tikkundannaha. Li tkun supperv ifisser li tafda aktar fik innifsek milli tafda f’Alla jew fil-qaddejja tiegħu. Meta b’umiltà inti tafda f’Alla u tagħraf il-qawwa u l-ħniena tiegħu, inti jista’ jkollok l-assigurazzjoni li l-kmandamenti tiegħu huma għall-ġid tiegħek. Inti tħossok ċert li kapaċi tagħmel dak kollu li l-Mulej jeħtieġ minnek jekk inti tafda fih.